Влечел расипан „Пинцгауер“ па направил сообраќајка на патот Штип-Велес, три лица повредени
Велешанец кој со своето возило „БМВ“ влечел најверојатно расипан „пинцгауер“ – модифицирано борбено возило за гаснење пожари, учествувал во тешка сообраќајна несреќа во која се повредени тројца лица.
Како што информира МВР, несреќата се случила синоќа околу 23 часот на регионалниот пат Штип–Велес. Во сударот учествувале три возила: „Тојота“, управувана од 66-годишниот Б.И. од Велес, „Лада“, управувана од Л.Б. (31) од Башино Село, и „БМВ“ управувано од Д.М. (31) од Велес, кое во моментот влечело „пинцгауер“ во сопственост на Дирекцијата за заштита и спасување.
Во несреќата, тешко се повредиле возачот на „Тојота“-та и неговата 64-годишна сопатничка К.И., додека возачот на „БМВ“-то се здобил со полесни повреди. Сите повредени биле пренесени во Општата болница во Велес.
На местото на настанот извршен бил увид од страна на екипа од СВР Велес.
