ВЛАСТА И ОПОЗИЦИЈАТА СО РАЗЛИЧНИ МИСЛЕЊА: Дали Македонија заостанува во однос на регионот?
Власта и опозицијата имаат спротивставени мислења за тоа дали сите земји од регионот ја претекле Македонија и се понапредни.
ВМРО-ДПМНЕ вели дека државите од регионот ја поминаа Македонија, а кај нас секој трет граѓанин едвај преживува.
„Од 2017 до 2023 година, Босна и Херцеговина има 42 отсто раст на БДП по глава на жител, Србија 50 отсто, Бугарија 64 отсто, Албанија 52 отсто, а Македонија само 20 отсто. Исто така со СДС и ДУИ Македонија доби скоро 50 отсто поголема инфлација од земјите во ЕУ. Во ЕУ инфлацијата е 4.3 отсто, во Македонија 6.6 отсто. Воедно дури и последната анкета кажува дека над 80 отсто од граѓаните сметаат дека цените уште растат. Колку донесле подобар живот покажува фактот не само што расте сиромаштијата, туку екстремната сиромаштија. Од 56.000 во 2019, годинава ќе ја завршиме со 86.400 екстремно сиромашни, додека од 360.000 умерено сиромашни сега ќе имаме скоро 600.000 граѓани. Толку од фалбите за подобар живот со СДС и ДУИ. Ова значи дека над 80.000 луѓе едвај преживуваат со помалку од 80 денари, а помалку од 150 денари има секој трет човек во државава. А колку е добар стандардот говори и тоа што држави од соседството како Хрватска и Словенија за Македонија станаа како Германија, па граѓаните масовно таму си ја бараат иднината. Со оваа власт единствено што растат се сиромаштијата, инфлацијата, криминалот и корупцијата. Никогаш не било полошо, затоа е важно да ги поразиме“, велат од партијата.
Портпаролот на СДСМ Дарко Каевски вели дека економските политики на СДСМ даваат конкретен резултат, растат платите и пензиите. Вели дека СДСМ ја зголемиле просечната плата и таа денес е повисока од 630 евра.
„Нашето ветување за просечна плата го надминавме. Во времето на ДПМНЕ, во 2016 година, просечната плата изнесувала 360 евра. Со ДПМНЕ работниците земале дури за 270 евра помала просечна плата од денеска. ДПМНЕ беше фокусирана на споменици и жални врби, СДСМ е посветена на граѓаните, на работниците. За ДПМНЕ работниците беа само евтина работна сила, за СДСМ работниците и нивниот животен стандард се важни. Затоа минималната плата во времето на ДПМНЕ беше 9.000 денари а во некои области во текстилната и кожарската индустрија и помала. СДСМ ја зголеми минималната плата и денеска изнесува над 20.000 денари“, рече Каевски.
Според него, веќе не сме веќе земја со евтина работна сила туку земја која го вреднува, почитува и цени трудот на сите работници.
foto freepik.com
