Власта ги осуди националистичките скандирања во Куманово, ДУИ бара оставки
Непристојните повици на еден спортски натпревар во Куманово, премиерот Христијан Мицкоски рече дека не ги слушнал, но ги осудува.
„Да бидам искрен, додека бев таму, воопшто не забележав ништо затоа што беше мала група луѓе. Но, би сакал да ја искористам оваа можност за да се приклучам во осудата на национализмот и ксенофобијата, пред сè на тоа што се случи за време на кошаркарскиот натпревар меѓу Македонија и Романија, а потоа и да упатам порака до сите навивачки групи – да навиваат за спортот, за нивниот тим и за националниот тим на Македонија. Тоа е она што го поддржува оваа Влада, а сè друго ќе биде предмет на истрага и санкции, без разлика од која страна доаѓа“, изјави премиерот Христијан Мицкоски.
„Настанот во Куманово беше сериозен инцидент кој го вознемири целото јавно мнение. ВЛЕН остро го осуди тоа. Сепак, за разлика од времето кога ДУИ беше дел од владата, а ваквите случаи се прикриваа и игнорираа, денес државата реагира брзо, решително и транспарентно. Јавното обвинителство веќе има отворено предмет, а Министерството за внатрешни работи спроведува истрага и веќе ги повикува осомничените на разговор. Тоа е доказ дека денес институциите функционираат. Денес државата не се крие, не се обидува да го релативизира проблемот и не го штити никого“, вели Дритон Сулејмани од Влен.
Од ДУИ бараат оставка од Астрит Исени, заменик-министер за внатрешни работи.
„ДУИ беше јасна: нема да дозволиме Албанците и секој друг граѓанин да станат цел на фашистички повици во земјата каде што се коосновачи на државата! Поради тоа, денес бараме конкретна политичка одговорност: итна оставка од Астрит Исени, заменик-министер за внатрешни работи, и оставка од Сафие Садики Шаини, заменик-министерка за спорт, поради непревенирање, нереагирање, неспособност и молк пред еден тежок напад врз достоинството на албанските граѓани и меѓуетничкиот соживот“, вели Емир Сулејмани од ДУИ.
Вчер Кошаркарската федерација и Општина Куманово, преку писмени соопштенија ги осудија ксенофобичните повици на неколку лица во салата. Основното јавно обвинителство Куманово отвори постапка и издаде упатства до СВР Куманово за да ги истражи елементите на кривично дело поврзано со повиците со говор на омраза, како што велат, од непознати лица. Инцидентот се случи за време на кошаркарскиот натпревар меѓу репрезентациите на Македонија и Романија, кој се одигра на 2 август, при свеченото отворање на реконструираната спортска сала во Куманово.
