Владо Јаневски ѝ посвети песна на Сара Пројковска на концертот во Охрид

Владо Јаневски синоќа (8 август) на својот концерт во Античкиот театар во Охрид ѝ оддаде емотивна почит на Сара Пројковска – професорка по пијано и придружен вокал, која трагично загина во пожарот на 16 март во кочанската дискотека „Пулс“. Пројковска со години беше дел од неговиот бенд како придружен вокал.

„Лани на оваа сцена бевме 10, сега сме 9, Сара отиде. На концертите во Филхармонија во Скопје ми рече: ‘Баце, многу тажни песни правиш’. Ова ќе биде секогаш песната на Сара“, рече Јаневски пред да ја испее „Ненормален“, една од неговите најемотивни балади.

Публиката ѝ оддаде долг аплауз на Пројковска, која беше омилена соработничка на многу македонски поп-изведувачи. Со неа често настапуваше и Ана Костадиновска – нејзината најблиска пријателка и колешка која го преживеа пожарот, а која заедно со Теа Богатинова и Стево Чепишевски беше дел од придружните вокали на синоќешниот концерт. Во еден момент, Јаневски наместо Ана ја спомена Сара, додавајќи: „Намерно реков Сара, таа е секогаш со нас“.

Ова беше втор концерт на Владо Јаневски во Античкиот театар во рок од една година – лани настапи на истата сцена на 10 август. „Да сме живи и здрави, би сакал секое лето на почетокот од август да се гледаме овде. Ќе пееме три часа, па макар пет дена после тоа да не можам да зборувам“, рече тој.

Покрај хитовите кои веќе станаа евергрини, Јаневски ја изведе и новата песна „Штом сум среќна“, за која снимаше спот за време на концертот – традиција која ја практикува веќе години наназад. На крајот, најави и голем скопски концерт на 20 декември.