ВЛАДИН КАБИНЕТ: Државна помош за компанија „полна како брод“
Кабинетот на вицепремиерот за економски прашања Фатмир Битиќи сака да даде државна помош за фабриката за наменско производство на муниција во Самоков на АТС Гроуп, но Комисијата за заштита на конкуренцијата донела негативен заклучок.
Оваа компанија која ја поседува фабриката АТС АММО „Сувенир“ во Самоков за минатата година беше една од македонските фирми со најголема добивка за 2022. Оствари профит од 11,8 милиони евра. Во заклучокот на Комисијата се констатира дека постојат сериозни сомневања во дозволеноста на доделувањето на помошта за фабриката од Македонски Брод.
Според она што планирал кабинетот на Битиќи, на АТС АММО требало десет години да му се враќа исплатениот дел од данокот на добивка, пет години по ред да се покрива 10 отсто од инвестициските трошоци и уште дополнителни 10 отсто парична помош од инвестициските трошоци доколку не се намалува бројот на вработени и се зголемуваат приходите.
За ваквиот „пакет“ на поволности постојат сомневања кај Комисијата заради ретроактивно важење на договорот, можно кршење на ЕУ принципи, несигурноста дека ќе се води двојно сметководство и можност парите да се одлеваат во странство, како и поради структурата на самите три мерки за поддршка. Предметот е отворен на крајот на минатата година, а заклучокот е донесен на 4 октомври годинава.
Инаку фабриката во Самоков има површина од 300.000 метри квадратни и 40.000 метри квадратни производни простории со линии за производство на муниција од мал калибар од над 120 милиони парчиња годишно. „АТС муниција“ има околу 350 вработени. Само за малокалибарска муниција и каписли, како што објавија оттаму, инвестирале околу 50 милиони евра.
Фабриката влегува во холдингот АТС Груп, чија база е во индустриската зона Визбегово, а е во сопственост на бизнисменот повратник Шефкет Демировски. АТС Груп развива стотина нови производи годишно за елитните специјални сили. Производството е според стандарди и препораки кои ги бара НАТО и САД. Финалниот производ е наменет за извоз на странските пазари пред се во Европа, Турција и Катар.
Неодамна пуштената во употреба фотоволтаична централа „ФЕЦ Новаци”, инаку најголема во Македонија и воопшто на Балканот, со моќност од 55 мегавати, е во крајна сопственост на „АТС Гроуп“, а на настанот присуствуваше и државниот врв.
Во мај годинава министерката за одбрана Славјанка Петровска и заменик-претседателот во Владата задолжен за економски прашања Фатмир Битиќи беа во посета на оваа компанија. Во владиното соопштение потоа објавија дека ја споделиле можноста за домашните компании да учествуваат на тендерите на НАТО за набавки, процес во кој Центарот за поддршка на компании во Министерството за одбрана бил подготвен да даде поддршка.„АТС груп“ инаку е составена од три компании, а покрај таа во Самоков, има и две во Скопје, со над 500 вработени. Тие произведуваат композитни производи и производи наменети за опремување на армијата и полицијата во делот на балистичката заштита и балистичката безбедност.
Во јавноста сепак не избледе сеќавањето за притворањето на сопственикот Шефкет Демири само неколку месеци откако во 2019 година беше отворена фабриката во индустриската зона Визбегово. Тој беше притворен и осомничен во Белград за илегален откуп на интелектуална сопственост.
А.К.
