Владата тврди: Нема злоупотреба на владиниот авион
По обвинувањата од опозицијата за користењето на владиниот авион, Владата денеска соопшти дека леталото било користено исклучиво согласно законските прописи и утврдените процедури, оценувајќи дека критиките се дел од политичка хипокризија и сензационализам.
Од владината прес-служба посочуваат дека секое користење на авионот е евидентирано и документирано, во согласност со Правилникот за условите и начинот на негово користење, како и дека е предмет на институционална контрола. Според нив, ниту една активност не била надвор од утврдените процедури и нема злоупотреба.
Во реакцијата се наведува дека опозицијата ја игнорира, како што велат, хуманитарната и државничката димензија на користењето на авионот во итни ситуации. Потсетуваат дека леталото било ставено во функција и при транспорт и координација на активности поврзани со повредените од трагичниот пожар во Кочани.
Владата дополнително посочува дека истата политичка структура која денес упатува обвинувања, во минатото го користела владиниот авион за патувања кои, според нив, биле контроверзни во јавноста, вклучително и летови до Ниш.
Од таму оценуваат дека денешните критики претставуваат „класичен пример на политичка хипокризија“, додавајќи дека остануваат посветени на законитост, отчетност и транспарентност.
– Секој надлежен орган има право и обврска да изврши увид и контрола, и ние немаме што да криеме – наведуваат од Владата, истакнувајќи дека нивен приоритет се јавниот интерес и меѓународната позиција на државата.
