Владата со еден куп функционери за иселеништво и македонска дијаспора
Владата на 9 јануари со решение го назначила Фатон Асани за национален координатор за соработка со дијаспората, како нова функција што се воведува. Асани е поранешен директор на Агенцијата за управување со одземен имот, каде во март минатата година како кадар на СДСМ ја отстапи функцијата за да направи место за Дритон Небиу од Алијанса.
Асани ќе добива плата со коефициент од 3,3 просечни македонски плати. Секоја година со растењето на националната просечна плата, ќе расте и платата на Асани. Во меѓувреме тој беше во дилема дали да се врати кај семејството во Италија, или да превземе некоја друга функција во земјата.
На интернет страницата на Владата веќе се запишани други 13 национални координатори и заменици, а последен е Блерант Рамадани за информатика и енергетика. Таму се и имиња како Владимир Пивоваров, Роберт Алаѓозовски, Марјан Забрчанец, Нола Исмајлоска Старова, Роберт Поповски и други.
Обично овие владини активности, нешто што пред неколку години дури и не постоеја како функција или беше многу ретко, за одредена работа се даваат на кадри кои порано имале одредени силни позиции во извршната или во локалната власт, но од одредени причини биле сменети од тие места, па на овој начин им се наоѓа ангажман, но и солидна плата.
Владата има и министер без ресор задолжен за дијаспората – Џемаил Чупи, кој има свој кабинет со неколку вработени. Под Владата како основач постои и Агенцијата за иселеништво, каде има повеќе вработени, додека директор е Слободан Близнаковски, а има и заменик-директор.
Во земјата постојат 1.240 државни органи кои добиваат пари од буџетот, но за неколку стотини никој не знае кои се и што се, иако имаат управни и надзорни одбори. Дури и во рамките на самите министерства има посебни служби, инспекторати, управи за кои ретко кој знае. Постојат и голем број државни претпријатија и посебни институции, за кои кои нема регистар, а најмногу за нив може да се прочита во годишниот национален буџет што го гласа Собранието.
А.К.
