Владата со 500.000 евра ќе го модернизира „Градски парк“!

Салата „Градски парк“ одамна не ги исполнува условите за прволигашка кошарка затоа што поранешниот кошаркарски храм е во очајна состојба, а доказ за тоа е и неодамнешниот прекин на меч од Втората лига кога паркетот беше прекриен со вирови со вода поради протекување од покривот.

Централната власт реши да го спаси стариот дом на Работнички, откако денеска соопшти дека ѝ наложила на Агенцијата за млади и спорт (АМС) да ги префрли паричните средства на Општина Центар со цел да се реконструира салата, но засега не се откриваат повеќе детали.

„Владата, на денешната седницa донесе и Одлука за прераспределба на средства од Буџетот на Република Македонија за 2023 година, конкретно од Агенцијата за млади и спорт кон Општина Центар. Станува збор за 30.000.000 денари, што согласно владината одлука, се наменети за реконструкција на спортска сала ‘Работнички’ – Градски парк, општина Центар, во Скопје. Задолжена е Агенцијата за млади и спорт, средствата да ги префрли на посебна наменска сметка на Општина Центар. Согласно владината одлука, прераспределените средства кон Општина Центар се исклучиво за намената за којашто се доделени, односно за реконструкција на спортска сала ‘Работнички’ – Градски парк, општина Центар“, се вели во одлуката на Владата.