Владата купува луксузно јадење, ама вели дека е по пониски цени од претходните тендери
Тендерите на Службата за општи и заеднички работи се завршени или се во тек за набавка на јадење на Владата и другите поврзани институции. Некои од артиклите се луксузни и во големи количини, но од таму велат дека набавката е по поевтини цени за разлика од тие по кои што купувала претходната власт.
Портпаролката на Владата, Марија Митева, ги охрабри новинарите да ги побараат договорите од претходнатта година и дговорите од оваа година од СОЗР и да направат споредба. Според неа, ќе се постави прашањето како е можно договорите сега да имаат пониски цени.
-Прометот е зголемен за 15,5 проценти од услугите. Мислам дека доволно соопштивме пред јавноста и мислам дека ваквите вести ќе ги покриеме со кажување на вистината, рече портпаролката.
Од склучените договори за јавна набавка за овошјето и зеленчукот кои ги доби фирмата „Макмонт ДООЕЛ експорт-импорт“, на менито има ананас, авокадо, 600 килограми банани, грозје, 500 килограми свежи чистени ореви, јагоди, 300 килограми круши, калинки, кајсии, лупени кикирики, свежи капини, костени, лубеница, 1.100 килограми портокали, по 10 килограми цреши и папаја, цреши и лимета. Листата со зеленчукот содржи шери домати, бамји, брокули, дајкон, аспарагус, покрај вообичаените производи како грав, пиперки, зелка, компир и ориз.
Во тек е и огласот за набавка на риба, месо и сувомеснати производи објавен од страна на Службата за општи и заеднички работи, кој ќе финишира со договор во април. При тоа се бара крап А класа во свежа состојба. Се бара и свежа пастрмка од А класа, калифорниска свежа пастрмка од А класа, лосос од А класа, риба бранцин и риба орада.
Во повикот се бара економските оператори да наведат цени по килограм за филети ослиќ, суво смрзнат октопод, чистени лигни, чистени школки, краби, шкампи, ракчиња, микс морски плодови, чаден лосос. Од сувомеснатите производи се бараат следните артикли: говедско пушено (транжиран јунешки бут), пилешки виршли, свински кулен, свинска пршута без коски, говедска пршута без коски, свинска печеница, чадена свинска сланина, чаден свински врат, чадени свински ребра, пилешка и свинска шунка, свинска чајна колбасица, сушена свинска кременадла и говедски суџук.
Во јавните набавки се бара оператор за доставување на свеж јунешки мускул од млади говеда стари од 18 до 24 месеци (А категорија на говеда), јунешки бифтек добиен од млади говеда 18-24 месеци старост, јунешка кртина од млади говеда 18-24 месеци старост, јунешки бут без коска свеж добиен од млади говеда 18-24 месеци старост, јунешки џигер свеж добиен од млади говеда 18-24 месеци старост, јунешко шкембе свежо добиено од млади говеда 18-24 месеци старост, јунешки ребра свежи добиени од млади говеда 18-24 месеци старост, јунешкa кременадла свежа добиена од млади говеда 18-24 месеци старост, телешки ребра свежи добиени од млади говеда 12-18 месеци старост, телешки бут свеж добиен од млади говеда 12-18 месеци старост, телешки бифтек свеж добиен од млади говеда 12-18 месеци старост, свежа свинска кременадла добиена од свињи од категорија II, свежо свинско филе од иста таква свиња, свинско каре, свински врат без коска, свински бут кртина без коска, свинска плешка без коска, свински прави ребра меснати свежи, свинска коленица, јагнешко месо, свежо прасе прва категорија, крезли и јатки од свежо јагне. Ќе има и пилешко месо и тоа цели пилиња, пилешки стекови, копани со надкопани, обескостени батаци, мисиркини копани итн.
Завршен е и тендерот за леб, кори и кадаиф. Нарачано е и млеко до 2.500 литри и кашкавал до 600 килограми. Сепак, овие бројки се ориентациони и може да не се потрошат и СОЗР не е обврзан да ги нарача, туку фирмата е должна да ги даде цените согласно одредена количина која може, а и не мора да се потроши.
