Владата го затвори Фондот за иновации – потрошени над 6 милиони евра за проекти, ниту еден не е во функција
Фондот за иновации и технолошки развој (ФИТР) е избришан од Централниот регистар и официјално престанува со работа во својата досегашна форма, дознава 4NEWS.mk Решението за бришење е донесено на 20 август 2025 година, врз основа на Законот за едношалтерскиот систем и Законот за иновациската дејност, научно-технолошки развој и претприемништво.
Според документите, причината за престанокот е „на друг начин пропишан со закон“, а надлежностите, програмите и активностите на Фондот ќе ги преземе новоформираната Агенција за иновации, научно-технолошки развој и претприемништво.
Од ФИТР информираат дека институционалната промена ќе обезбеди континуитет во реализацијата на сите започнати програми и проекти, како и нови можности за поддршка на компании, стартапи, научни истражувачи и претприемачи. „Со оваа промена се гарантира непрекината поддршка на иновацискиот и претприемничкиот екосистем во државата“, наведуваат од Фондот.
Сите постојни корисници на финансиска и институционална поддршка од ФИТР ќе бидат дополнително информирани за понатамошните процедури и начинот на комуникација со новата Агенција.
Со оваа одлука се става крај на правното постоење на Фондот, кој изминативе години беше клучна институција за поттикнување на иновации и претприемништво во Северна Македонија.
Во периодот од 2018 до 2023 година преку Фондот за иновации и технолошки развој (ФИТР) се кофинансирани 48 проекти во вредност од 6,11 милиони евра.
