Владата ги казни млекарниците кои чесно ги намалија цените

Марина Манева од млекарницата „Млечен пат“ за Телма изјави дека оние компании кои веќе ги намалиле цените на своите производи пред да биде донесена владината одлука, ќе треба да работат со загуби.

Таа вели дека некои млекарници веќе ги намалиле цените со добивањето на субвенционирана електрична енергија на слободниот пазар, која во меѓувреме беше предвремено укината, и со тоа Владата создава нелојална конкуренција.

Владата донесе одлука од 17 март млекото и млечните производи да ги намалат своите цени за 10 отсто во однос на оние кои биле актуелни на 1 март.

– Пример, две компании пред да добијат субвенционирана струја, продавале млеко по иста цена од 80 денари, но едната го намалила во меѓувреме на 70 денари и сега ќе треба да го намали за 10 отсто, значи на 63 денари, а другиот, кој не ја намалил претходно цената, ќе ја симне на само 73 денари, вели Манева.

Таа додава дека прашањето е колку ќе биде рентабилна првата компанија и како ќе ја санира загубата.

– Млекото нема да го снема, но со загубите ќе се справат најверојатно со задолжување. Но доколку има мерка, да не се фаворизира никој и да се замрзне највисоката продажна цена за млеко која за сите треба да биде исто, додава Манева.