Владата формира Национален совет за дигитална трансформација и сајбер безбедност
На предлог на премиерот Христијан Мицкоски, Владата донесе одлука за формирање на Национален совет за дигитална трансформација и сајбер безбедност.
Советот, кој ќе има клучна улога во координирањето и имплементацијата на политики поврзани со дигитализацијата и заштитата од сајбер закани, е воспоставен на владината седница одржана на 6 мај 2025 година.
Советот ќе биде предводен од премиерот како претседател, а негов заменик ќе биде вицепремиерот и министер за транспорт. Во него членуваат и високи владини претставници, директори на релевантни агенции, академски експерти и претставници од деловниот сектор и невладините организации. Секретарот на Советот ќе биде назначен од Генералниот секретаријат на Владата.
Телото ќе има задача да предложува стратегии, планови и законски измени за дигитална трансформација, да следи и анализира состојбата со дигитализацијата во институциите и приватниот сектор, како и да предлага мерки за поддршка на дигиталното вклучување, електронската трговија, дигиталните услуги и усвојување на нови технологии.
Посебен акцент се става и на сајбер безбедноста. Советот ќе го надгледува спроведувањето на Стратегијата за сајбер безбедност, ќе предлага мерки при сајбер кризи и ќе соработува со Советот за безбедност.
Со оваа одлука се укинуваат постоечките совети за дигитална трансформација, сајбер безбедност и ИКТ форумот, а новиот Совет ќе ги обедини сите овие функции во една институционална рамка.
Советот ќе се состанува најмалку два пати годишно, а ќе поднесува и годишен извештај до Владата, најдоцна до 31 јануари за претходната година.
