Владата донела клучен План за енергија и клима, но никој не следи дали се спроведува
Иако Македонија има усвоено клучен стратешки документ за напуштање на јагленот и транзиција кон зелена енергија, Државниот завод за ревизија (ДЗР) откри критичен неуспех во владеењето: целосно отсуствува механизам за следење и контрола на неговото спроведување.
Станува збор за Националниот план за енергија и клима, кој Владата го усвоила во 2022 година. Овој план ги дефинира амбициозните цели на државата до 2030 година, вклучувајќи намалување на емисиите на стакленички гасови за 82% во споредба со 1990 година, целосно затворање на термоелектраните на јаглен и постигнување на 38% удел на обновливите извори во крајната потрошувачка на енергија.
Сепак, ревизорите утврдиле дека овој клучен документ постои само на хартија.
„Утврдено е дека не се изработени извештаи за следење на имплементацијата на планот, поради што отсуствува мониторинг над спроведувањето на политиката и остварување на целите“, се вели во извештајот на ДЗР.
Овој административен пропуст е директно поврзан и со хаосот во енергетскиот сектор. Ревизорите констатирале дека Владата нема усвоено ниту „Индикативен план за изградба на капацитети за производство на електрична енергија од обновливи извори на енергија“. Отсуството на ваква јасна стратегија, според ДЗР, е причината за несоодветното одлучување и неможноста да се приоретизираат огромниот број барања за инвестиции во обновливи извори.
Извештајот на ревизорите слика состојба на стратешки процес кој е напуштен веднаш по неговото донесување, оставајќи ја енергетската иднина на државата без јасен правец и контрола.
