Влада за 4NEWS.mk: Очекуваме оставка од Коцевски
Владата реагираше на денешното гласање за интерпелацијата на државниот јавен обвинител Љупчо Коцевски, нагласувајќи дека пораката што ја испрати Собранието е „силен институционален сигнал кој не смее да биде игнориран“.
„Очекуваме државниот јавен обвинител да постапи морално и да поднесе оставка. Тоа би било одговорен и достоинствен чин, во интерес на правдата и довербата на граѓаните,“ се наведува во одговорот на Владата испратен до 4NEWS.mk
Од Владата додаваат дека со денешниот исход „паднале во вода тезите што со месеци ги пласираа опозициските партии за наводна спрега помеѓу Владата и Обвинителството“.
„Оваа Влада не калкулира со правдата,“ порачаа од таму.
Во реакцијата се упатува и критика до ДУИ, при што реториката на оваа партија е оценета како „базирана на поделби и страв“.
„Наместо да ја злоупотребуваат етничката чувствителност за лични политички цели, најмалку што треба да направат е да се извини на Албанците за лагите што со месеци ги кажуваа. Време е да почнеме да градиме политика на одговорност, а не на манипулација,“ завршува одговорот на Владата.
Собранието со 71 глас за попладнево изгласа недоверба на Љупчо Коцевски.
