Влада: Европарламентарците изгласаа 100 милиони евра помош за Македонија
Владата соопшти дека европарламентарците изгласале одобрување на 100 милиони евра макрофинансиска помош за Македонија. Средствата од овој инструмент ќе бидат достапни во две транши. Владата го поздрави одобрувањето како, што велат од таму, уште еден пример за партнерство со ЕУ.
Денеска членовите на Комитетот за меѓународна трговија го поддржаа предлогот на Европската комисија, со што средствата од овој инструмент треба наскоро да бидат ставени на располагање и ќе следува потпишување на Меморандум за разбирање помеѓу Македонија и Европската Унија.
„Макрофинансиската помош е условена со доброто владеење и управување со јавните финансии, односно самиот инструмент е поврзан со имплементацијата на политики поврзани со управувањето со јавните финансии, даночниот систем, јавно-приватни партнерства, подобрување на деловната околина, фискалната транспарентност, транспарентноста во доделување на државна помош, енергетска ефикасност, реформи во правосудството, како и борбата против корупцијата. Предвид се зема и Инструментот за претпазливост и ликвидност кој Министерството за финансии минатата година го обезбеди преку ММФ, а кој Фондот го има само со земји со здрави економски фундаменти“, соопшти Владата.
