Влада ја измени уредбата за утврдување на смрт и критериумите за трансплантација
Владата на седницата одржана на 19 август 2025 година донесе уредба за изменување на постојната Уредба за клиничките прегледи и дополнителните испитувања за утврдување на смртта на лице, чии делови од телото може да се земат заради пресадување.
Со измените, наместо најмалку два клинички прегледи, сега е доволно да се изврши најмалку еден преглед при утврдување на смртта. Дополнително, наместо повеќе параклинички тестови, се предвидува изведување на еден потврден параклинички тест од страна на лекарот кој го врши прегледот.
Овие промени се однесуваат и на поблиските критериуми што мора да ги исполнуваат членовите на комисијата која со сигурност го утврдува престанокот на работата на мозокот – клучниот момент за донаторството на органи.
Уредбата стапува во сила осмиот ден од денот на објавување во „Службен весник на Република Северна Македонија“.
