„ВИТАМИНКА“ ДРЖИ НИВО! Како најголемата домашна прехранбена индустрија инкасираше 59,3 милиони евра?
„Витаминка“ ја одржува својата пазарна позиција дома, успеа да го зголеми и извозот и да ја одржи добивката на ниво од претходната година. И понатаму најголем предизвик за компанијата остануваат финансиските расходи и нивото на кредитна изложеност
„Витаминка“ успеа да ја зголеми продажбата во 2024 година за 7 отсто, а при тоа од извоз на своите производи инкасираше 36,2 милиони евра, покажуваат официјалните податоци од финансиските извештаи на најголемата македонска кондиторско-прехранбена компанија.
Во годината која помина во бројни и значајни регионални и континентални неизвесности, војни и инфлаторни и кредитни ризици „Витаминка“ успеа да го зголеми извозот за 11 отсто и тоа е резултат за почит.
Вкупната продажба на „Витаминка“ надмина 59 милиони евра и тоа е за 7 отсто подобро остварување од претходната споредбена 2023 година.
Иако не голем во бројки, но сепак значаен, придонес за „Витаминка“ даваат и останатите оперативни приходи кои лани изнесувале 1,32 милиони евра и се за 24 отсто повисоки од претходната споредбена година.
Оперативните расходи на прилепската компанија за лани изнесуваат 58,6 милиони евра и се повисоки за 7 отсто во споредба со 2023 година. Очекувано и логично најголема трошковна ставка се суровините и други материјали и за нив „Витаминка“ платила 37,15 милиони евра. И тие растат за 7 отсто во однос на 2023 година. Значајно зголемување има кај трошоците за вработените. За нив „Витаминка“ издвоила 9,28 милиони евра што е за 17 отсто повеќе од претходната година. Овој параметар покажува дека „Витаминка“ е посветена на мотивација на своите вработени од кои очекува за возврат лојалност и продуктивност.
Услугите со карактер на материјални трошоци се трета најголема ставка и нивната вредност е 4 милиони евра.
Оперативната добивка на прилепската компанија изнесува 2 милиони евра и е пониска за 11 отсто во споредба со претходната година.
Клучен предизвик на „Витаминка“ и лани се финансиските расходи. Тие изнесувале 1,19 милиони евра и се за 5 отсто повисоко од 2023 година.
Нето добивката изнесува 1,07 милиони евра и е за 4 отсто пониска од претходната споредбена година. Тука нема значајни поместувања.
Билансот на состојба покажува значајно зголемување на вложувањата во финансиски средства и тие се удвоени лани во споредба со 2023 година.
Вредноста на тековните средства бележи зголемување од 8 отсто и тоа е пред се заради зголемените побарувања од купувачи кои на крај на 2024 година надминале 10 милиони евра.
Што се однесува до обврските на друштвото тука е евидентно зголемување за 5 отсто. Вредноста на обврските е 36 милиони евра. Вредноста на тековните обврски на компанијата е повисока од 20 милиони евра, а од тоа краткорочни обврски по кредити и хартии од вредност се 9,8 милиони евра. Долгорочните кредитни обврски изнесуваат 15,6 милиони евра и тие се исти како и претходната година.
Н.С.
