ВИДЕО Зомби вулканот Утурунцу во Боливија покажува знаци на активирање по повеќе од 250.000 години
Вулканот Утурунцу во Боливија, иако не е еруптирал повеќе од 250.000 години, повторно ги привлекува научниците поради зачудувачки знаци на активност, поради што доби прекар „зомби вулкан“. Иако се смета за неактивен, тој испушта гасови, предизвикува земјотреси и покажува подземни движења, слични на активни вулкани, јавуваат светските медиуми.
Сателитските снимки уште пред две децении открија дека областа околу врвот на Утурунцу — највисокиот врв во југозападна Боливија — се подига и повторно се спушта, опфаќајќи површина широка 150 километри. Научниците неодамна го истражуваа овој феномен подетално, користејќи сателитски податоци, сеизмичка анализа и компјутерски модели, со цел да откријат дали Утурунцу повторно се активира.
Наодите, објавени на 28 април во списанието Proceedings of the National Academy of Sciences, откриваат дека вулканот не се однесува како типичен еруптивен систем. Наместо класична магматска ерупција, под површината се одвиваат сложени интеракции меѓу магма, гасови и солени течности во сè уште недоволно истражен хидротермален систем, што предизвикува таканаречени „зомби треперења“.
Под Утурунцу, на длабочина од 10 до 20 километри, се наоѓа едно од најголемите познати магматски тела во Земјината кора – Алтиплано-Пунско магматско тело. Овој џиновски резервоар на магма, кој се протега околу 200 километри, долго време е предмет на интерес на геолозите поради неговата активност.
Иако постоењето на хидротермален систем кој го поврзува магматскиот резервоар со вулканот е одамна познато, дури неодамна истражувачите успеале да добијат јасна слика за тоа како магмата и течностите комуницираат. Со анализа на преку 1.700 земјотреси од 2009 до 2012 година, тие креирале високорезолуциски слики од подземната структура на вулканот.
Дополнително, измерени се електрични, гравитациски и хемиски промени во карпите, што открива сложена мрежа од подземни канали низ кои циркулира геотермално загреана течност.
Иако нема индикации за непосредна ерупција, научниците предупредуваат дека ваквата подземна активност заслужува постојано следење, бидејќи може да укаже на постепено будење на некогаш мирниот Утурунцу.
