ВИДЕО СТРАШНА ЕКСПЛОЗИЈА ВО ИТАЛИЈА: Во фабрика загинаа тројца работници, обработувале муниција

Тројца работници загинаа во експлозија во фирмата што собира воена опрема за целите на демилитаризација „Сабино Есплоденти“ во италијанскиот приморски град Казалбордино, додека неколку други се повредени. Засега не се познати причините кои довеле до експлозијата.

Убиени се Фернандо Ди Нела (50) од Ланкано, Џанлука Де Сантис (40) од Палата и Џулио Романо од Казалбордино. Полицијата е на лице место и врши увид, јавува Rai News.

Како што се наведува во соопштението на компанијата која ја најави експлозијата, во овој момент останува необјаснета причината што довела до загуба на тројца работници.

„Тие беа обучени експерти“

– Тие беа обучени експерти и ги знаеја ризиците поврзани со извршувањето на нивните должности. Несреќата, за жал, се случи во фазата на преработка на муниција, извршена во име на Агенцијата за одбранбена индустрија и покрај најстрогите мерки на претпазливост предвидени со Законот за спречување несреќи. Компанијата во рамките на своите надлежности ќе се грижи за сите потреби на семејствата на жртвите – се наведува.

Градоначалникот Филипо Паолини потпиша декрет за откажување, во знак на жалост, на традиционалните манифестации со кои се одбележува почетокот на последната тријада од септемвриските празници, кои ќе бидат одложени за 24 часа.

– Со оглед на многу тешката несреќа што се случи, Општинската администрација во договор со Комитетот за свечености, со почит кон лицата кои ги загубија животите и нивните семејства, одлучи да ја прекине музичката програма закажана за вечерва и огнометот закажан за 4 часот наутро. Сите сме со семејствата на загинатите во овој трагичен и болен момент – рече градоначалникот.

Во изминатиот период фатална несреќа во истото претпријатие

Како што се наведува, компанијата „Сабино Есплоденти“ повторно е во центарот на случувањата. Имено, на 21 декември 2020 година, уште тројца работници од истата компанија го загубија животот додека работеа во просторија со статична печка, систем кој се користи за согорување на прашок за лансирање, уреди за осветлување, димни бомби и експлозиви.

Утре пред судија на претходна расправа ќе се одржи прелиминарно рочиште за несреќата во оваа компанија во 2020 година. Во постапката има десет обвинети.Поточно обвинителството го обвини највисокото раководство на компанијата за прекршување на низа правила за спречување несреќи при работа.