(ВИДЕО) Слушнете ја новата балада на Мартинијан Кирилиовски – „Удри ме“
Со силна емоција и продукциски квалитет, Мартинијан Кириловски го претставува своето најново музичко остварување со наслов „Удри ме“, баладa која со својата длабочина и искреност има потенцијал да стане нова химна за сите што некогаш љубеле, изгубиле, или останале неми пред крајот на една приказна.
Музиката и аранжманот се потпишани од етаблираниот композитор Илија Ќосевски, кој умешно создава звучна атмосфера што истовремено гали и распарчува. Текстот на Весна Малинова е една исповед за љубовта, кривицата и тежината на неизговореното, моќен приказ на внатрешниот судир што го чувствуваме кога љубовта згаснува.
Гласот на Мартинијан е носечкиот елемент што ја води песната низ слоеви на каење, признание и прифаќање. „Удри ме“ не е само песна, тоа е катарзичен момент, огледало на човечката слабост и копнеж по прошка, дури и ако таа никогаш не дојде.
Видеоспотот, снимен на неколку урбани локации низ Скопје, е во режија на Томислав Живковиќ, познат по својот визуелен сензибилитет и умешноста да ја преточи емоцијата во слика. Во видеото се појавува и моделот Ева Пауновиќ.
„Удри ме“ е песна за сите оние кои љубеле погрешно, молчеле кога требало да зборуваат и останале кога требало да си заминат. Песна што боли, но на оној вистински, прочистувачки начин. За да се потсетиме дека сè што нè удира, нè гради. И дека од секој пад може да излезе нов звук, нов стих, нов живот.
Песната е достапна на сите дигитални платформи, а видеото може да се погледне на официјалниот Јутјуб канал на Мартинијан Кириловски.
