ВИДЕО На врв од зграда во Штип за да го гледаат Дино Мерлин, рекордна посетеност на „Пастрамајлијада“
Синоќа Штип беше центар на музичките случувања во Македонија. Балканската ѕвезда Дино Мерлин приреди спектакуларен настап на Пастрмајлијада, кој привлече илјадници посетители и создаде атмосфера што долго ќе се памети.
Градот живееше во ритамот на музиката – полни локали, мирис на пастрмајлии и голема раздвиженост низ улиците. Концертот беше повеќе од обично музичко шоу, претворајќи ја вечерта во вистински фестивал на емоции и добра енергија.
Дел од најверните фанови, решени да не пропуштат ниту миг, се качија и на кровови од згради за да го следат настапот и да пеат заедно со Мерлин. Публиката го пречека со овации и пееше во еден глас најголемите хитови на пејачот.
Со овој настап, Дино Мерлин уште еднаш ја потврди својата позиција како едно од најголемите и најсакани музички имиња во регионот. За штипјани и гостите, вечерта ќе остане запаметена како уникатен дел од Пастрмајлијада – полна со радост, музика и незаборавни моменти.
