ВИДЕО МВР заплени рекордни 27 тони марихуана, најголема акција досега во Македонија

Македонската полиција спроведе историска акција за заплена на марихуана, поради поврзаност со претходната конфискација на пет тони дрога во Србија, која била прошверцувана од Македонија. Синоќа, полицијата заплени околу 27 тони марихуана, што претставува најголема конфискација на дрога досега во земјата.

Во рамките на акцијата беа претресени магацините на компанијата за производство на медицински канабис „Алфафарм ДОО Скопје“, регистрирана во 2023 година во кругот на фабриката Охис. Според податоците од Централниот регистар, компанијата била основана со основен капитал од 529 илјади евра и има повеќе ко-сопственици. Измени во сопственичката структура биле направени само неколку дена пред да бидат фатени петте тони марихуана во Србија.

Во Србија се осомничени пет лица, од кои две сè уште се недостапни за органите на прогонот, а се гонат за неовластено производство и ставање во промет на наркотични дроги. Бројот на осомничени и кривичните дела во Македонија ќе бидат соопштени по завршувањето на целосната истражна постапка.

Во текот на денот се очекуваат дополнителни официјални информации од МВР и од Основното јавно обвинителство за гонење организиран криминал.