ВИДЕО Колку површина изгоре? Вчерашниот пожар кај Илинден од авион
Пожарот кој вчера попладне избувна во реонот кај Илинден остави зад себе огромна опожарена површина, што најдобро се гледа од воздух. На фотографиите и видеата направени од страна на репортерот на 4NEWS.MK снимени од авион, јасно се забележува црната лента од изгорена вегетација што се протега во близина на индустриската зона и автопатот кон Скопје.
Огнената стихија се ширела брзо по сувата трева и ниската вегетација, а според првичните проценки, изгоре површина од неколку десетици хектари.
Пожарот зафати и црква во селото Мршевци, а како што се гледа и опасно се приближил до магацините и фабриките во зоната, како и до куќите во блиските населби.
Благодарение на навремена интервенција на територијалните противпожарни единици, пожарот беше ставен под контрола пред да се прошири кон густо населените области.
Надлежните институции апелираат до граѓаните да не палат стрништа и да бидат крајно внимателни при движење во природа, особено во периоди со високи температури и силен ветер.
