ВИДЕО Давкова призна! Трајко Славески не бил нејзин избор за гувернер на Народна банка
Претседателката Гордана Силјановска Давкова јавно одговори на дел од критиките во врска со изборот на новиот гувернер на Народната банка, посочувајќи дека одлуката ја донела по внимателна анализа на стручноста, интегритетот и кредибилитетот на кандидатите, а не врз основа на политичка припадност или лични преференции.
„Не прифаќам генерални квалификации. Да, преферирам жени, тоа го повторувам, и имав и свој кандидат и кандидатка. Но, мора да бидеме реални – не е доволно само да предложите некого, ако тој кандидат нема да помине на гласање“, рече Силјановска Давкова, алудирајќи на потребата од политички договор во Собранието.
Таа го бранеше професорот Трајко Славевски, кој беше предложен за нов гувернер, од критиките поврзани со неговата партиска ангажираност во минатото. „Законот за Народна банка не предвидува ограничување за партиска функција пред мандатот, туку само за време на мандатот“, изјави претседателката, додавајќи дека вистинскиот проблем со партизацијата на институциите се јавува кога на клучни позиции доаѓаат нестручни и неквалификувани лица.
„Не е фер да се дискредитира професорот Славевски. Станува збор за светски признаен експерт, за кого не постојат афери, ниту криминал. И порано сме имале гувернери кои биле политички активни – како Петар Гошев, па тоа не било пречка“, рече таа.
Силјановска истакна дека нејзината одлука се темелела на проценка на стручност, искуство и непристрасност. „Кога ќе дојдете до одредена возраст и сте остварени во својата професија, имате зрелост и капацитет да водите институција од вакво значење. Важно ми беше да не препознавам партиска реторика во кандидатот“, нагласи таа.
Во однос на мандатот, претседателката упати забелешка кон законската рамка. „Седумгодишниот мандат, со можност за реизбор, значи потенцијални 14 години на функција. Тоа е многу. Како поранешна членка на Венецијанската комисија, сметам дека за вакви долги мандати треба да се предвиди само еден циклус“, рече Силјановска.
Претседателката упати и критика кон дел од јавноста која, според неа, го напаѓа секој избор од политички или лични причини. „Постои една група луѓе која мисли дека сите други се неспособни – сè знаат, сите ги критикуваат. Тоа не го разбирам“, рече таа.
На крајот, таа испрати порака за поголем консензус и политичка одговорност. „Потребно е за клучните прашања да се договараме дома, а не да излегуваме со спротивставени ставови надвор. Тој принцип се обидувам да го применувам и во однос на власта и во однос на опозицијата“, заклучи Силјановска Давкова.
