ВИДЕО „Арамии, лопови“ ечи пред Собрание: ССМ ги блокира улиците, се бара минимална плата од 600 евра
„Арамии“ и „Лопови“ се слуша утринава пред Собранието, каде работниците предводени од ССМ поставија блокади на главните пристапи. Револтот е огромен, а пораката јасна – крај на молчењето за работничките плати додека функционерите си ги зголемуваат сопствените примања.
Слободан Трендафилов од ССМ упати директно обвинување дека пратениците се кријат од сопствениот народ. Според него, многумина од нив дошле на работа уште пред 9 часот само за да не ги погледнат работниците во очи. Блокадата на улиците „Даме Груев“ и „11 Октомври“ има за цел да ги спречи пратениците да влезат со возила и да наплатат огромни патни трошоци, принудувајќи ги да одат пешки или со автобус.
Работниците порачаа дека е срамно минималната кошничка да расте, а платите да стагнираат.
Додека пратениците уживаат во високи примања и планираат нови зголемувања на платите од над 20%, работникот едвај преживува.
Барањето останува итно: минимална плата од 600 евра и линеарно зголемување на сите плати за 6.000 денари.
Додека пред Собранието се слушаат извиците „лопови“, внатре пратениците планираат да ја одржат седницата во 11 часот. Синдикалците остануваат на улиците, порачувајќи дека повеќе нема да дозволат да бидат игнорирани.
