ВИДЕО 20 коли поминаа патарина без да платат, од ЈПДП велат првиот платил за другите, ама не за сите
На социјалните мрежи се појави снимка на која се гледа како дваесетина автомобили поминуваат наплатна рампа без запирање и без очигледно да платат патарина. Видеото, снимено на патарината кај Гостивар, стана вирално и предизвика бурни реакции на социјалните мрежи.
По бројните реакции во јавноста и видеото Јавното претпријатие за државни патишта (ЈПДП) се огласи со соопштение во кое потврдува дека е направена внатрешна контрола веднаш по објавата.
„Првото возило во колоната платило патарина и за останатите зад него, но има случаи каде тоа не е направено,“ наведуваат од претпријатието.
Од ЈПДП информираат дека веднаш по објавата, директорот дал итен налог за внатрешна проверка и дека контролата покажала оти кај неколку возила навистина не била извршена наплата.
„По целосно расветлување на случајот, ќе бидат преземени мерки за утврдување на одговорност на вработените, а ќе следат и соодветни дисциплински постапки,“ стои во реакцијата.
Сепак, објаснувањето не ги смири граѓаните, кои остро реагираа поради чувството на нееднаквост и неказнивост. На социјалните мрежи се појавија бројни коментари во кои граѓаните посочуваат дека кога обичен возач не плати патарина веднаш добива казна, додека во конкретниот случај сè уште нема информации за санкционирани лица.
