Велешанката која фати тендери од 8 милиони евра била вработена службеничка во „Пошта“

Велешанката Маја Јорданова, сопственичка на скопска фирма „Браинкоде“ за трговија на мало со весници и канцелариски материјал, која фати три тендери во вредност од 8 милиони евра за адитиви и антифриз за потребите на РЕК Битола, односно РЕК Осломеј, била вработена службеничка во АД Пошта, објави ИРЛ.

Фирмата лани имала вкупен приход помал од 350.000 евра, а немала ниту податок за број на вработени. 

Сега излегува дека Јорданова од Велес пред три години е вработена во АД Пошта. Седиштето на „Браинкоде“ се наоѓа во семејна куќа во скопската населба Ѓорче Петров.  На истата адреса се регистрирани повеќе фирми, чии сопственици или управители се луѓе од Велес. „Браинкоде“ е основана во септември 2017, како компанија која ќе се занимава со трговија со канцелариски материјали, опрема и хартија.  

Нејзин братучед бил Данчо Стојановски од Велес, кој бил комерцијален директор и член на Управен Одбор на АД ЕСМ од мај 2021 до јуни 2022 година.