Вечерва целосно помрачување на Месечината – граѓаните ќе можат да го набљудуваат со телескоп на плоштад Македонија

По подолг период, љубителите на астрономијата повторно ќе имаат можност да уживаат во редок небесен настан – целосно помрачување на Месечината. Доколку времето биде ведро, Скопското астрономско друштво ќе биде присутно со два телескопа на плоштад Македонија, каде граѓаните ќе може одблизу да го набљудуваат феноменот.

Помрачувањето започнува уште пред изгрејсонцето на Месечината кај нас, па затоа првите фази нема да бидат видливи од Македонија. Според астрономите, во Скопје Месечината ќе излезе над источниот хоризонт нешто пред 19 часот, но од центарот на градот ќе се појави околу 19:15 часот, веќе повеќе од половина затемнета од сенката на Земјата.

Околу 19:30 часот Месечината целосно ќе влезе во сенката и ќе добие впечатлива црвеникава боја, со нијанси кои ќе варираат од интензивно црвено до портокалово. Најдраматичниот момент се очекува во 20:11 часот, кога ќе биде најдлабоко во сенката и ќе изгледа најтемна.

Излегувањето од сенката ќе започне околу 20:50 часот, а процесот ќе заврши околу 22 часот. Потоа ќе остане само полусенката, која е тешко видлива со голо око.

Од Скопското астрономско друштво најавуваат дека очекуваат голем број посетители и апелираат за трпение, бидејќи секој ќе има можност да погледне низ телескопите. За оние кои располагаат со двогледи или телескопи, препорачуваат да ги понесат со себе, а љубителите на фотографијата да се обидат да го овековечат феноменот со поголем објектив.

„Сè што ни преостанува е да се надеваме на ведро небо и да уживаме во ова прекрасно небесно шоу“, порачуваат астрономите.

Настанот на плоштад Македонија започнува вечерва во 19 часот.