Васоски дебитираше со реми: Вардар и со играч повеќе и по две водства остана без победа (ФОТО)
Кристијан Ефтимов четири минути пред крајот на мечот ги шокираше вардарци со голот после првиот корнер на кратовци, откако Милош Николиќ прво погоди дирек по центаршутот, а на одбиената топка неговиот соиграч го матира Филип Гачевски.
Вардар имаше две водства, првото по гол од пенал на Дарко Мицевски кога Арсим Љамалари беше исклучен за стартот за најстрога казна врз Азер Омерагиќ, а откако Дарко Анѓелески со убав шут од 20 метри израмни во 52-та, Давид Велковски одговори со втор гол за црвено-црните.
И кога сѐ изгледаше дека Вардар ја контролира играта, а Дарко Глишиќ промаши зицер, 15-на минути пред крајот со одлична одбрана на Дејан Божиновски ги спаси кратови, ги остави во мечот и на крај четата на Горазд Михајлов се избори за бод.
Васоски денеска дебитираше, се врати на кормилото после неполни три години откако замина од клубот, а ова беше деби и за новиот спортски директор Ѓоко Хаџиевски, исто така легенда на Вардар и поранешен тренер, но допрва овој нов двоец ќе треба да го издигне најголемиот макеоднски клуб од дното.
Вардар го освои првиот сезонски бод, но сега е последен на табелата откако Гостивар го победи Работнички со 2-0 за свои први бодови и прв триумф сезонава после три порази. Бившиот турски репрезентативец Алпер Потук даде гол за водство уште во 12-та минута, а десет минути пред крајот Ремзифаик Селмани ја дуплираше предноста и обезбеди победа.
Шкендија еден час се мачеше со Брегалница, преживеа зицер на Колин Андерсон пред крајот на првиот дел, за потоа Агансспахиќ и Бруно Дита во последната третина од мечот со два гола да им донесат трет триумф на тетовци за максимални 9 бода од трите досегашни одиграни меча.
Скопската пресметка во Ѓорче Петров помеѓу Македонија ЃП и Шкупи заврши без победник и без голови.
Ова коло свое продолжение има утре со пресметката на Брера и Тиквеш во Струмица, а ќе заврши на 27 септември за кога е одложен мечот на Воска Спорт со првакот Струга, поради европскиот плејоф на стружани, кои веќе имаат еден меч за доигрување од второто коло со Шкендија.
ПРВА ЛИГА, 4. КОЛО
Вардар – Силекс 2-2 (1-0)
Мицевски 40 п., Велковски 60 – Анѓелески 52, Ефтимов 86
Македонија ЃП – Шкупи 0-0
Гостивар – Работнички 2-0 (1-0)
Потук 12, Селмани 80
Шкендија – Брегалница 2-0 (0-0)
Аганспахиќ 62, Дита 90+7
УТРЕ
Брера – Тиквеш
НА 27 СЕПТЕМВРИ
Воска Спорт – Струга
ТАБЕЛА: Брера 9 (-1), Шкендија 9 (-1), Тиквеш 6 (-1), Работнички 6, Брегалница 6, Силекс 5, Шкупи 5, Струга 3 (-2), Македонија ЃП 4, Воска Спорт 3 (-1), , Гостивар 3, Вардар 1.
