Васев и Нухи негираат вина: Обвинението е политички монтирано
Во Основниот кривичен суд – Скопје денеска продолжи судењето за случајот „Онкологија 2“, во кој на обвинителна клупа седат поранешниот медицински директор на Клиниката за радиотерапија и онкологија, Нино Васев, и поранешниот економски директор Нехад Нухи.
Двајцата обвинети пред Судот изјавија дека не се чувствуваат виновни и дека обвинението за несовесно работење и финансиски криминал е „неосновано и политички монтирано“.
Васев, кој ја водеше Клиниката од 2017 година, рече дека цел живот ја посветил на спасување човечки животи и отфрли каква било одговорност за злоупотреби.
„Имам наследено реверс од директор што јас го сменив и кој е потписник на вештачењето против мене во овој случај. Второто економско вештачење е потпишано од економска директорка што беше разрешена на мое барање поради финансиски злоупотреби,“ рече Васев, додавајќи дека токму во неговиот мандат долгот на Клиниката бил намален од 35 милиони на 30 илјади евра.
Тој потенцираше и дека тендерите за онколошки лекови не ги спроведувала Клиниката, туку Министерството за здравство, а одложувањето на тендерите значело недостиг на лекови и терапија за пациентите.
Второобвинетиот Нехад Нухи исто така истакна дека се чувствува невин и најави дека тоа ќе го докаже во текот на постапката. Неговиот бранител, адвокатката Анита Бегова, во воведниот говор тврдеше дека обвинението е „конфузно, нејасно и политички монтирано“.
Одбраната денеска поднесе писмено барање за изземање на едно од вештите лица на Обвинителството.
Судењето за „Онкологија 2“ ќе продолжи на 16 септември, кога ќе бидат сослушани сведоци предложени од обвинителството.
