Вјоса Османи: Вучиќ на повеќето состаноци е вистински крал на драмата
Вучиќ само драми, не нуди решение, вели косовската претседателка Вјоса Османи.
Османи изјави дека вонредни локални избори на северот може да се распишат ако 20 отсто од гласачите тоа го побараат со потпишување петиција.
Таа за агенцијата Ројтерс изјави дека петицијата е „најдемократскиот начин“ за организирање нови избори.
„Мислам дека на овој начин ќе осигуриме учество на Србите, бидејќи барањето мора да дојде од нив, од граѓаните“, кажа таа.
Османи наведе дека смената на актуелните градоначалници преку петиција би било „како референдум“. Вели дека целиот процес би можел да биде завршен за неколку месеци.
Меѓутоа, не е јасно дали локалните српски гласачи би учествувале во петицијата, наведува Ројтерс.
Османи додаде дека пред распишувањето нови избори, Косово мора да добие гаранции од меѓународната заедница дека Белград нема да се меша.
Османи минатата недела во Молдавија се сретна со српскиот претседател Александар Вучиќ на состанок организиран од францускиот претседател Емануел Макрон и германскиот канцелар Олаф Шолц. Таа претседателот на Србија го опиша како „крал на драмата“.
„Вучиќ на повеќето состаноци е вистински крал на драмата. Така што, нормално, се обиде повторно да направи доста драма, но не изнесе ниедна идеја која би придонела на мирот и стабилноста во регионот“, кажа Османи.
Додаде дека тие напади на бес, Вучиќ требал да ги надмине.
Соединетите Американски Држави (САД) и Европската Унија (ЕУ) ѝ се закануваат на Приштина, да ги исполни барањата на Србите или ќе има последици.
foto Facebook/Vjosa Osmani
