Узурпиран паркингот за туристички автобуси во Центар, на забрането паркираат и службени возила на министерствата
Низ центарот на Скопје секојдневно може да се забележи узурпацијата на јавниот простор. Таков пример е и малата улица пред Музејот на Град Скопје.
Граѓаните до нашата редакција се жалат дека иако местото е наменето за паркирање на туристички автобуси, просторот секојдневно е претворен во див паркинг за службени и приватни возила.
Како што може да се забележи, на истото место има и знак за забрането сопирање и запирање, но тоа не ги спречува возилата од Министерството за енергетика да се паркираат, а меѓу нив е и автомобилот на министерката Сања Божиновска.
Недалеку од местото има и полициска станица која се чини дека не реагира.
На местото може да се забележи и ѓубре, па така наместо туристите да имаат соодветен пристап и пријатен прв впечаток од градот, ги дочекува хаос, блокирани тротоари и паркирани возила на секоја можна површина.
Овој пример уште еднаш ја покажува неодговорноста на институциите, кои наместо да дадат пример, тие први ги кршат правилата.
