УВОЗОТ НА СТРУЈА СПАДНА НА 20 ПРОЦЕНТИ – Но и домашно произведената струја е добиена од увозен јаглен

Дали енергетската криза ќе биде доволно силна причина да ги промени состојбите во енергетскиот сектор во Македонија? Но, и дали високите цени на струјата ќе бидат причина за намалување на увозот на енергија и за зголемување на домашното производство? Или, сепак промените кои настанаа минатата година ќе бидат краткорочни, па ќе се вратиме на „старите“ навиките на раст на увозот на електрична енергија штом спласнат високите цени.

Минататаа година увозот на електрична енергија изнесувал малку над 20 проценти, при што е забележан пад од 13 проценти на увозот на енергија во споредба со 2021 година. Ова го откриват податоците од Годишниот извештај на Регулаторната комисија за енергетика.

Македонија со години веќе важи за увозно зависна земја во однос на потребите од електрична енергија. Увозот на електрична енергија во изминатите години се движеше од 20 проценти до 30 отсто од вкупната бруто-потрошувачка на електрична енергија и директно зависи од домашното производство на електрична енергија.

– Во 2022 година нето-увозот на електрична енергија изнесува 20,70 отсто, додека во 2021 година истиот изнесуваше 33,15 проценти од вкупната бруто-потрошувачка. Ваквото намалување на нето увозот на електрична енергија се должи пред сè на намалената потрошувачка на електрична енергија и зголеменото производство. Сепак треба да се има предвид дека целокупните потреби од мазут за ТЕЦ „Неготино“ доаѓаат од увоз и дел од потребите за термоелектроцентралите се обезбедуваат со увоз на јаглен. Вкупниот номиниран увоз на електрична енергија во 2022 година изнесува 2.209 гигаватчаса и е понизок за 24,86 проценти во однос на увозот во 2021 година – се нагласува во извештајот на РКЕ.

Регулаторите потенцирале дека споменатите количества на електрична енергија не се целосно искористени за потребите на потрошувачите во Македонија. Вкупното домашно производство на енергија не е целосно искористено за потребите на потрошувачите, туку дел од него преку трговците е извезено од македонскиот електроенергетски систем.

Извозот на електрична енергија произведена во нашата земја во 2022 година, изнесува 523 гигаватчаса што е зголемување од 45,7 отсто во споредба со 2021 година кога извозот изнесувал 359 гигаватчаса. Оттука произлегува дека вкупниот извоз на електрична енергија во 2022 година изнесува 624 гигаватчаса, што е зголемување од 34,95 проценти во однос на 2021 година, односно намалување од 38,36 отсто во однос на 2020 година – се појаснува во извештајот на РКЕ.

Регулаторите појаснуваат дека увозната зависност на нашата земја се одредува врз база на односот помеѓу домашното производството на електрична енергија и брутопотрошувачката на електрична енергија, во која се зема предвид потрошувачката на електрична енергија на крајните потрошувачи, вклучувајќи ја и електричната енергија потребна за покривање на загубите на електрична енергија во електропреносната мрежа и во електродистрибутивните мрежи.

Петранка Огнаноска