Утре со затворени раскрсници во Скопје ќе се прави генерална проба за симулациска вежба за земјотрес
Наместо обратно со метеж, паркирани возила на трета лента, блокирани раскрсници бидејќи некој поминал на жолто-црвено, утре без сообраќај ќе се прави генерална проба за симулациска вежба за земјотрес во Скопје. Останува да се молиме дека следниот земјотрес нема да се случи или доколку има, да се најави за да може да ги затвориме сите раскрсници во Скопје.
Така Брзата помош, пожарната и полицијата нема да имаат проблеми со метеж во градот, ќе поминат слободно, бидејќи нема да има паркирано возила на трета лента по булеварите, раскрсниците ќе бидат празни, а граѓаните земјотресот ќе го дочекаат дома.
А сега да ве информираме и дека утре од во Скопје, во периодот од 9 до 14 часот, неколку крстосници ќе бидат затворени за сообраќај оти ќе се одржи генерална проба за симулациска вежба во итна ситуација – земјотрес „Хуманитарен одговор 2023“ планирана за в среда, во организација на Црвен Крст на РСМ, под покровителство на Претседателот на државата во Градски парк Скопје.
Како што најави Министерството за внатрешни работи, утре од 9 до 14 часот затворени ќе бидат крстосниците: бул.„Илинден“ од крстосница со бул.„Св.Климент Охридски“ до крстосница со ул.„Франклин Рузвелт“ и од крстосница со ул.„Бледски Договор“ до крстосница со ул.„Никола Тесла“, ул.„Наум Наумовски Борче“, ул.„Јордан Хаџиконстантинов-Џинот“ од крстосница со ул.„Орце Николов“ до крстосница со ул.„Ленинова“ (ул.„Аминта Трети“) и бул.„8-ми Септември“ од крстосница со бул.„Илинден“ до сервисна улица за влез во х.Александар Палас.
Главниот настан ќе се одржи на 18. месецов (среда) во периодот од 09.00 до 14.00 часот поради што затворени за сообраќај ќе бидат крстосници: бул.„Илинден“ од крстосница со бул.„Св.Климент Охридски“ до крстосница со ул.„Франклин Рузвелт“ и од крстосница со ул.„Бледски Договор“ до крстосница со ул.„Никола Тесла“, ул.„Наум Наумовски Борче“, во продолжение ул.„Јордан Хаџиконстантинов-Џинот“ до крстосница со ул.„Ленинова“ (ул.„Аминта Трети)“, ул.„Ристо Шишков“ од крстосница со ул.„Наум Наумовски Борче“ до крстосница со ул.„Ленинова“ (ул.„Аминта Трети“), сообраќајниците околу градски стадион Тодор Проески и бул.„8-ми Септември“ од крстосница со бул.„Илинден“ до сервисна улица за влез во х.Александар Палас.