Утре „Ден Д“ за работничките права: Синдикалната кошничка достигна 65.500 денари, Владата и синдикатите седнуваат на маса
Во сенка на новите поскапувања и синдикалната потрошувачка кошничка која надмина 1.000 евра, Владата и синдикатите утре ќе ги соочат ставовите на седница на Економско-социјалниот совет (ЕСС).
На маса ќе се најдат жешките теми: раст на платите, утврдување на минималната плата и мерки за заштита на куповната моќ.
Синдикатите влегуваат во преговорите со јасен став – граѓаните сè потешко ги поднесуваат основните животни трошоци. Тие бараат конкретни решенија и јасни рокови, а не само декларативни заложби.
Од друга страна, Владата најавува отворен дијалог. Заменикот министер за економија е оптимист и најавува дека со конкретни економски мерки, очекувањата се инфлацијата следната година да падне на 2,5%.
Сепак, „ладен туш“ доаѓа од Организацијата на работодавачи. Нивниот став останува непроменет:
„Зголемување на плата без зголемена продуктивност тешко ќе има.“
Како аргумент во преговорите, Сојузот на синдикати на Македонија (ССМ) ги изнесе најновите пресметки. Синдикалната потрошувачка кошничка за четиричлено семејство за декември изнесува 65.492 денари.
Според нивната математика:
Овој месец е поскап за над 300 денари споредено со ноември.
Само за храна и пијалаци се потребни 23.648 денари.
Најголемо поскапување има кај облеката и обувките (над 140 денари месечно).
Уште полоша е сликата за семејствата кои немаат сопствен дом. Ако семејството живее под кирија, потребниот месечен буџет скока од 65.000 на над 80.000 денари.
Додека синдикатот мери колку е минимумот за преживување, Владата подготвува своја методологија. Од 1 јануари, државата ќе прави пресметка на трошоците за четиричлено семејство, но таа нема да биде минимална како синдикалната, туку просечна. Според најавите, токму оваа „државна кошничка“ ќе служи како основа за креирање на идните економски политики и плати.
