УСВОЕНО: Бугарија ја укинува давачката за рускиот гас, еве што им ја забрза одлуката
И покрај прекините, поради противењето на опозицијата, со гласање беше укината дополнителната такса за транспорт на руски гас преку Бугарија и беше прифатен амандманот со кој се забрзува укинувањето на ограничувањата за увоз на руска нафта, што примарно е во корист на рафинеријата Лукоил Нефтохим, пренесува бугарскиот портал Новините.
Дополнителниот данок на рускиот гас беше укинат откако Унгарија објави дека ќе стави вето на влезот на Бугарија во Шенген зоната.
Потегот на Владата во октомври да наметне давачка за намалување на профитот на рускиот Гаспром ја зголеми загриженоста за високите цени и прекините на снабдувањето низ југоисточна Европа. Додека Бугарија допрва треба да им наплати на клиентите на својот мрежен оператор, унгарските власти тоа го нарекоа „непријателски чекор“ и повикаа на истрага на ЕУ за одлуката.
Да потсетиме, унгарскиот министер за надворешни работи Петер Сијарто претходно денеска најави дека Унгарија ќе стави вето на влезот на Бугарија во Шенген зоната доколку не ја укине транзитната такса на рускиот гас. Тој рече дека Будимпешта јасно ѝ ставила до знаење на Софија дека ќе стави вето на Бугарија доколку таксата остане на сила за главниот пат за гас до Унгарија.
„Им кажавме на Бугарите дека ако го задржат овој данок, ако ја загрозат безбедноста на унгарското снабдување со енергија, ќе ставиме вето на нивниот влез во Шенген“, рече Сијрото, пренесе Ројтерс. Британската новинска агенција пренесува дека, додека повеќето западноевропски земји одлучија постепено да го укинат рускиот гас, Унгарија добива 4,5 милиони кубни метри гас од Русија годишно, по договорот од 2021 година.
