Уставните измени ќе ги остави пратениците без плажа и годишен одмор
Најавата од премиерот Димитар Ковачевски дека во следните две недели Уставните измени ќе ги испратат до Собранието, е само најава дека пратениците ќе останат без редовниот годишен одмор во август па така на плажа и море може да заборават, бидејќи како што вели премиерот, пред нив ќе биде иднината на државата.
Ако во следните две недели Владата ги испрати предлог уставните измени до Собрание, по одобрувањето од страна на собранискиот спикер Талат Џафери за истите би започнал да тече и рокот кој е предвиден согласно Деловникот за работа на Собранието.
Постапката за измена на Уставот поминува низ три фази:
- Во првата етапа Собранието, со двотретинско мнозинство, носи одлука за пристапување кон измена на Уставот.
- Втората е фаза на утврдување на нацрт-амандманите и за тоа е доволно мнозинство од вкупниот број пратеници или 61 глас.
- Третата финална фаза е усвојување на амандманите и за тоа повторно е неопходно двотретинско мнозинство или најмалку 80 гласа.
Процедура:
Текстот на нацрт амандманите на Уставот со образложение, предлагачот, во случајов Владата, го доставува до претседателот на Собранието, кој го доставува до пратениците и до претседателот на Републиката најдоцна 30 дена пред одржувањето на седницата на Собранието.
За секој нацрт амандман има претрес одделно во Собранието и може да се дадат мислења и предлози. Претресот може да трае најмногу три работни дена по текстот на нацртот на секој амандман одделно.
Претрес на текстот на нацрт амандманите има и во Комисијата за уставни прашања и во Законодавноправната комисија и може да трае најмногу три работни дена по текстот на нацртот на секој амандман одделно.
Потоа, Собранието со апсолутно мнозинство гласови (61) од вкупниот број пратеници, го утврдува нацртот на секој амандман на Уставот одделно.
Следува јавна расправа за предложените амандманите во рок определен од Собранието.
На предложените амандмани, предлагачот, секој пратеник и работно тело, можат да поднесат амандмани најдоцна осум дена пред седницата на Собранието на која ќе се усвојуваат амандманите на Уставот.
Има уште еден претрес во Комисијата за уставни прашања и Законодавно-правната комисија за секој предложен амандман на Уставот, кој може да трае најмногу три работни дена.
Потоа предложените амандмани одат на општ претрес во Собранието, кој може да трае најмногу три работни дена за секој предложен амандман.
Собранието се изјаснува одделно за секој амандман со апсолутно мнозинство.
На крај, амандманите за измена на Уставот се донесуваат со двотретинско мнозинство гласови од вкупниот број пратеници. За амандманите да се гласа има рок од најмалку 80, а најмногу 100 дена.
