УСТАВНИОТ СУД ГО ПОВЛЕЧЕ ПРЕДЛОГОТ ЗА КЗ: Се чека Собранието да ги донесе новите измени
Уставниот суд на денешната седница постигна консензус да го повлече предлогот за одлучување по иницијативата за Кривичниот законик (КЗ). Оваа одлука доаѓа како резултат на веќе отпочнатата законодавна постапка во Собранието за измена и дополнување на законот во редовна процедура.
Со овој потег, Уставниот суд ја одлага конечната одлука во однос на членот 353 од КЗ, кој се однесува на „Злоупотреба на службената положба и овластување“. Судот смета дека е целисходно да се почека финалниот збор на законодавниот дом, со цел да се види во која насока ќе се движат новите законски решенија.
Иницијативата пред Уставниот суд беше под лупа на јавноста бидејќи одлучуваше за уставноста на измените од 2023 година, кои предизвикаа бројни застарувања на предмети за висока корупција. Сега, Судот му дава предност на Собранието да ја корегира или допрецизира правната рамка преку тековната редовна постапка.
„Конечната одлука на Уставниот суд се одлага сè до завршувањето и донесувањето на измените и дополнувањата на Кривичниот законик од страна на Собранието“, појаснуваат извори од Судот.
Откако Собранието ќе ги усвои новите измени, Уставниот суд ќе треба да ја оцени нивната усогласеност со Уставот, доколку повторно се појават иницијативи. Дотогаш, остануваат во сила постоечките одредби, додека пратениците дебатираат за враќање на повисоките казни и редефинирање на службените злоупотреби.
