„Усје“ со неделен отчет: Емисиите се во законските рамки – технолошки е невозможно да работиме без филтри
Цементарницата ТИТАН Усје го објави редовниот неделен извештај за квалитетот на емисиите во воздухот за периодот од 12 до 18 декември 2025 година. Од компанијата тврдат дека сите измерени средно-дневни вредности од ротирните печки 3 и 4 се под граничните вредности определени со закон.
Во контекст на зимската сезона и зголемената чувствителност на јавноста за аерозагадувањето, од „Усје“ потенцираат дека нивното влијание врз амбиенталниот воздух е минимално и не корелира со високите вредности на ПМ10 честичките во градот.
Од компанијата категорично ги отфрлаат шпекулациите дека филтрите се исклучуваат, особено во ноќните часови.
Дополнително, се појаснува дека печките работат континуирано 24 часа. Тврдењето дека загадувањето доаѓа од таму во зима го побиваат со фактот дека производството на цемент е всушност поинтензивно во летните месеци поради градежната сезона, отколку во зима.
Емисиите на вкупна прашина, SO2 и NOx се следат 24 часа, 365 дена во годината преку независен автоматски систем за мониторинг, воспоставен уште од 2007 година.
Од „Усје“ посочуваат дека вршат паралелно мерење на амбиенталниот воздух во самиот круг на фабриката.
„Паралелното мерење на ПМ10 честички во кругот на ТИТАН Усје не покажува меѓузависност со состојбите со амбиенталниот воздух измерени на други мерни станици, надвор од цементарницата“, велат од компанијата.
За да ја потврдат транспарентноста, ТИТАН Усје упати отворена покана до граѓаните, невладините организации и медиумите да ја посетат компанијата во кое било време и да добијат одговори на сите прашања.
