Урла во Измир – совршена дестинација за одмор и опуштање
Мирниот крајбрежен град Урла во Измир е одличен избор за релаксација исполнета со уживање за сите сетила. Опкружен со живописни маслинови градини, овошни насади и лозја, Урла е погоден за посета во текот на целата година, но особено мај е пријатно време за истражување на уличките покриени со калдрма, шетање покрај камените куќи сместени во заливот и откривање на гастрономските атракции што ги нуди овој крај.
Урла се наоѓа на полуостровот Чешме, на помалку од еден час возење од центарот на Измир. Ова шармантно гратче е познато по својот висококвалитетен начин на живот и опуштениот егејски дух. Бројните бутик хотели со поглед на море нудат совршен престој во хармонија со амбиентот на градот.
Посетителите можат да прошетаат до пазарот Малгака, каде има изобилство на локални и органски производи или до улицата Урла Арт, каде прекрасно реставрираните историски куќи се претворени во пријатни кафулиња и симпатични мали продавници. Морското крајбрежје на Урла е долго 40 километри и тука се сместени многу плажи со кристално чиста вода.
Благодарение на благата клима и плодната почва во регионот, Урла е позната и по кулинарските специјалитети во кои преовладуваат маслиново масло, билки и свежи морски плодови.
Младите умешни готвачи им даваат модерен шмек на деликатесите на Урла и ги претвораат локалните состојки во незаборавни рецепти, па затоа тука има и бројни префинети ресторани, кои заслужено добиле Мишелин ѕвезди и сомелиерски награди.
Микроклимата на Урла е погодна за лозарство и производството на вино во овој предел опстојува уште од античко време. Винските тури им овозможуваат на туристите прошетка низ лозјата, посета на винарници и дегустација на различни вина, особено оние направени од автохтони локални сорти грозје.
За оние што сакаат во своето патување да вклучат и историски знаменитости, Урла нуди можност за посета на антички места и запознавање со славната историја на анадолските земји. Местото Лиман Тепе ја раскажува историјата од бронзеното време, додека Клазоменија, во северниот дел на градот, е едно од основните пристаништа на антиката. Античкиот град ја раскажува длабоко вкоренетата приказна за маслинките во овие земји со првата работилница за маслиново масло во светот.
Доколку престојувате во Урла можете да го посетите и античкиот град Ефес, кој е заштитен од УНЕСКО и да ги видите импресивните остатоци како што е Библиотеката на Целзиус. Покрај тоа, Ефес е отворен за ноќни посети во лето, нудејќи уникатно искуство како дел од проектот „Ноќни музеи“.
