УНИБАНКА СО ДОБРИ ВЕСТИ! Расте кредитирањето, зголемена добивката, задоволни вработени
УНИБанка ја подобри својата пазарна позиција во условите на остра конкуренција во сегментот на средни банки. Растат нето приходите од камати, зголемени се оперативните приходи, а расте и добивката. Задоволни се и вработените затоа што лани добија милион евра повеќе од тоа што им беше исплатени во 2023 година. При тоа УНИБанка го зголеми кредитирањето за 9%, а го одржа нивото на депозити на речиси идентично ниво како и во 2023 година
УНИБанка во 2024 година остварила 26,6 милиони евра оперативни приходи од своето работење. При тоа доминантно учество во структурата на приходи имаат нето приходите од камати кои изнесуваат 19,6 милиони евра и бележат благ раст во однос на претходната 2023 година.
Кај втората по големина приходна ставка има благо намалување во споредба со претходната година и тоа се должи на растот на расходите за провизии и надоместоци. Нето приходите од провизии и надоместоци за 2024 година изнесуваат 4,58 милиони евра.
Нето приходите од курсни разлики се најмала од приходните ставки на УНИБанка и изнесуваат 732.000 евра.
Значаен раст на приходите лани во споредба со 2023 година банката остварила кај останатите приходи и тоа заедно со нето приходите од камати придонело за раст на профитот во споредба со претходната споредбена година.Од останати приходи УНИБанка лани остварила 1,7 милиони евра што е за 50 отсто подобар резултат од претходната година.
Нивото на резервации на кредитните пласмани бележи многу благ раст во споредба со претходната година. За нив УНИБанка на крај на 2024 година издвоила 4,88 милиони евра.
Вреди да се истакне тоа што УНИБанка лани посветила големо внимание на тоа нејзините вработени да бидат задоволни и со тоа да бидат и лојални на компанијата. За нив банката лани издвоила еден милион евра повеќе од 2023 година. Поточно издвоила 7,6 милиони евра или 15 отсто повеќе од претходната споредбена година. Воедно трошоците за вработените се најголема ставка со расходната структура на УНИБанка.
Добивката на УНИБанка за 2024 година изнесува 7,9 милиони евра што претставува за нијанса подобро остварување од претходната 2023 година. Во услови на силна конкуренција особено во сегментот на средни банки на кој работи УНИБанка ова е солиден резултат кој укажува дека банката не само што ја задржала туку и ја подобрила својата пазарна позиција во 2024 година во споредба со претходната споредбена година.
УНИБанка лани го зголеми кредитирањето за 9 отсто и годината ја заврши со кредитно портфолио со вкупна вредност од 308 милиони евра.
Паралелно со тоа оваа банка значајно го намали вложувањето во хартии од вредност (државни обврзници н.з.) и тоа за 34 отсто во однос на претходната споредбена година. Нивото на вложувања во државни хартии од вредност на крајот на 2024 година изнесува 47 милиони евра.
Депозитите банката ги одржува на ниво повисоко од 341 милиони евра и тоа е речиси идентично со претходната година.
Н.С.
