Украина потврди дека спроведува „офанзивни акции“ и дека има „успех“ кај Бахмут
Украина потврди дека спроведува „офанзивни акции“ на делови од фронтот и рече дека постигнала напредок во близина на разурнатиот источен град Бахмут, истовремено минимизирајќи го обемот на нападот што Москва тврди дека го одбил.
„Одбранбената операција (на Украина) вклучува контраофанзивни акции. Затоа, спроведуваме офанзивни дејствија во некои сектори“, рече заменик-министерката за одбрана на Украина Хана Малиар преку Телеграма.
„Секторот Бахмут останува епицентар на непријателствата. Напредуваме на прилично голем фронт. Постигнуваме успех и ги преземаме височините. Непријателот е во дефанзива“, додаде Малиар.
Русија претходно објави дека одбила офанзива од големи размери на истокот и југот на Украина, како и дека им нанела големи загуби на Украинците во жива сила и опрема.
Киев со месеци подготвува голема контраофанзива, чија цел е да ги истисне руските војници од зоните што ги окупираа. Сепак, украинските власти предупредија дека нема да откријат ништо за нивните планови или датуми.
Руската паравоена група „Вагнер“ во мај објави дека го освоила градот Бахмут по најдолгата и најкрвавата битка во војната. Шефот на „Вагнер“ Евгениј Пригожин потврди дека украинските сили повторно зазеле дел од градот Берхивка, северно од Бахмут.
Сепак, украинскиот заменик министер за одбрана не кажа ништо за местата на југот на Доњецката област и во близина на Запорожје, каде Москва тврди дека ги отфрлила украинските војници.
