Украина ја одбележува годишнината од ослободувањето на градот Буча
Украинците денеска ја слават првата годишнина од ослободувањето на градот Буча од руската окупација, објави Ројтерс. Украинскиот претседател Володимир Зеленски изјави дека Киев никогаш нема да им прости на одговорните за наводните злосторства таму.
На крајот на март минатата година, украинските сили ја вратија контролата врз градовите Буча и Ирпин, лоцирани северозападно од Киев, откако руските сили се откажаа од обидот да го заземат главниот град.
Меѓународните истражители сега собираат докази во тие градови и на други места каде Киев вели дека руските трупи извршиле злосторства од големи размери. Москва ги отфрла обвинувањата. Откако Украина ја врати контролата над Буча, низ светот беа емитувани потресни снимки од трупови на улиците на градот.
Руската окупација на Буча траеше 33 дена, што резултираше со смрт на повеќе од 1.400 луѓе, вклучително и 37 деца, објави Киев.
Комеморативните настани по повод годишнината се очекува да се одржат подоцна во Буча, предградие на главниот град што сега редовно го посетуваат странски лидери.
Сепак, борбите продолжуваат со полна сила во источна и јужна Украина, каде што руските сили држат огромни делови од територијата заземена од нивната инвазија во февруари минатата година.
