Укинати визите за Косово, откако граѓаните за пет години на ЕУ и платија 89 милиони евра
Европскиот парламент во Стразбур денеска без гласање ја одобри одлуката за визна либерализација за граѓаните од т.н. Косово.
Во таа прилика претседателката на Европскиот парламент Роберта Мецола изјави дека не добила никаков предлог за отфрлање на ставот на Советот и каков било амандман.
Граѓаните на Косово се единствените во регионот на кои сè уште им е потребна виза за патување во земјите од Шенген зоната, а во последните пет години за ЕУ визи платија 89 милиони евра.
Одлуката на Европскиот парламент за укинување на визите за граѓаните на Косово е и последниот чекор во процесот на укинување на визниот режим, кој се одолговлекува со години.
Како што е најавено, граѓаните на Косово од први јануари следната година ќе можат без визи да патуваат во земјите од Шенген зоната.
Новите правила ќе им овозможат на имателите на пасоши издадени од привремените власти во Приштина да влезат во ЕУ без виза во период од 90 дена во кој било период од 180 дена, а треба да стапат во сила најдоцна од 1 јануари 2024 година.
По усвојувањето во ЕП, визната либерализација за т.н Косово треба да биде потпишано и објавено во официјалниот весник на ЕУ.
