Училиштето Св. Кирил и Методиј во Велес постои 166 години и е најстаро во општината
Најстарото основно училиште во Велес е „Св. Кирил и Методиј“ од Велес.
За век и половина низ ова училиште минале илјадници ученици, а некои од нив оставиле силна трага не само во живеењето на Велес, туку во Македонија и на Балканот.
ОУ „Св. Кирил и Методиј“ започнало со работа во средината на 19-тиот век, од тогаш датира првиот пишан документ, иако се верува дека тоа во друга форма работело и претходно. Низ сите овие векови, училиштето постоело на истото место. Училиште на значајни личности од нашата историја
– Во овој дел на Велес, во Долни Дуќани имало два метоси, црковни училишни објекти каде се извршувало црковно образование, тоа биле Св. Атанасиј и Св. Кирил и Методиј, едниот женски, другиот машки метох. Богатите велешки трговци купиле место, баш на оваа локација, каде и денес работи училиштето, тука заеднички почнале да учат и женските и машките деца во едно училиште кое го добило името „Св. Кирил и Методиј“. Тоа се случило во 1857-тата година а се учело на говорот на месното население. Настава одржувале световни учители, кои покрај црковните предмети предавале и математика, земјопис, историја, алгебра – вели Тодор Димов професор по историја.
Во најстарото основно училиште во Македонија” Св. Кирил и Методиј” учеле многу истакнати дејци од постарата и понова македонска историја, Андреја Дамјанов, Васил Главинов, Ѓорги Зографски, Данчо и Тодор Зографски, Петре Прличко, Кочо Рацин, Панко Брашнаров, па до помладите професорот Васил Тоциновски. ракометарот Пепи Манасков, виолинистот Костадин Богдановски, научникот Александар Донев се само дел од плејадата познати личности кои основното образование го завршиле во клупите на ова училиште.
Од архивата на Дневник
