Ученици учеле под небезбеден покрив без сеизмичка заштита – направена штета од над 200.000 евра

Секторот за внатрешни работи Струмица, преку Одделението за внатрешни работи Гевгелија, поднесе кривична пријава до Основното јавно обвинителство во Гевгелија против пет физички лица и едно правно лице од Скопје, поради сериозни пропусти при реконструкцијата на кровот на Основното училиште „Петар Мусев“ во Богданци.

Како што соопшти МВР, првопријавениот Г.Г. (39), сопственик на пријавеното друштво за проектирање и инженеринг, заедно со второпријавениот И.Т. (45), се сомничат за „злоупотреба на службената положба и овластување“ и „предизвикување опасност при градежни работи“.

Тие, спротивно на законските прописи, не обезбедиле стручно мислење за степенот на сеизмичка заштита на објектот, со што го загрозиле животот и здравјето на учениците и вработените во училиштето.Истиот кривичен опис се однесува и на пријавеното правно лице, а дополнително, две лица, Љ.Т. (62) и Л.Г. (69), кои биле овластени ревизенти, се гонат за „несовесно работење во службата“.

Тие не ги констатирале сериозните пропусти во проектот, туку дале позитивен извештај, со што му овозможиле на пријавеното друштво да стекне имотна корист од околу 129.800 денари, а државниот буџет да биде оштетен за 12.678.049 денари.

Случајот останува отворен, а од СВР Струмица информираат дека истрагата продолжува за утврдување на евентуална вмешаност и на други лица.