Убиецот од Батинци најверојатно ја напуштил Македонија – бил баран со потерница веќе една година!
Муса Џавит, кој минатата недела го застрела и уби армиски офицер во скопското село Батинци, најверојатно ја напуштил земјава, објави телевизија 24. Според информациите од Министерството за внатрешни работи, Џавит веќе е под меѓународна потерница повеќе од една година, поради претходно убиство, а по последниот инцидент, полицијата ја засилила соработката со странските служби за да го пронајде.
„Нашите органи соработуваат и се во постојана комуникација со органите на прогонот на сите земји каде постои индиција дека бегалецот може да се крие“, информираат од МВР.
Џавит има богато криминално досие и за една година се поврзува со две смртни ликвидации. Првото убиство се случило минатото лето, а се претпоставува дека било поврзано со криминалниот клан Беланоца, кој беше мета на полициска акција. И покрај тоа, Џавит останал на слобода и продолжил со криминалното делување.
Последното злосторство се случи минатата недела, кога пред влезот на селото Батинци со два куршума во градниот кош го уби 50-годишниот армиски офицер, додека тој бил во автомобил со својата ќерка. Според информациите, убиството било мотивирано од одбиена љубов – девојката, ќерка на жртвата, не сакала да има врска со осомничениот.
„Ќерката на убиениот војник го одбила Џавит, кој ѝ се заканувал по телефон неколку часа пред нападот. Додека се враќале од лекарски преглед, осомничениот им го пресекол патот, излегол од возилото и пукал во таткото, по што избегал“, наведуваат полициски извори.
Според податоците, Џавит бил пуштен од затвор во јуни 2023 година, каде служел казна за нелегално поседување оружје. Само еден месец по неговото ослободување го извршил првото убиство.
Полицијата сè уште трага по него, а јавноста е вознемирена од фактот дека лице со такво досие успева да се движи и делува слободно, дури и по издадената меѓународна потерница. Се очекува дополнителна реакција од институциите и засилени безбедносни мерки.
