Турската централна банка ја зголеми референтната каматна стапка по осми пат за помалку од една година
Централната банка на Турција (TCMB) пред неколку дена објави дека осми пат по ред ја зголеми референтната каматна стапка, овој пат од 42,5 на 45 отсто.
Почнувајќи од јуни 2023 година, банката ја зголеми референтната каматна стапка за вкупно 3.650 базични поени.
Постоечкото ниво на домашна побарувачка, постојаната инфлација во услужниот сектор и геополитичките ризици продолжуваат да вршат нагорен притисок врз инфлацијата во Турција, според веб-страницата TCMB.
Сепак, последните податоци покажуваат дека домашната побарувачка во Турција се намалува бидејќи монетарното затегнување се одразува и на финансиските услови, а забележани се и некои други позитивни сигнали, се посочува во соопштението на банката.
Централната банка на Турција најави продолжување на рестриктивната монетарна политика со цел да се потисне инфлацијата во земјата и нагласи дека последиците од монетарното затегнување се забележуваат дури по одреден временски период.
Комитетот за монетарна политика на ТЦМБ ќе продолжи внимателно да ги следи показателите за инфлација и решително да ги користи сите инструменти што му се на располагање за да ја постигне својата основна цел, а тоа е стабилноста на цените, се заклучува во соопштението.
Годишната стапка на инфлација во Турција се искачи на 64,77 отсто во декември од 62 отсто во ноември, објави турскиот институт за статистика – Туркстат на почетокот на јануари.
