Трипуновски: Модернизацијата и млади земјоделци – клуч за иднината на земјоделството
Министерот за земјоделство, шумарство и водостопанство Цветан Трипуновски, продолжува со интензивна поддршка за модернизација на земјоделството, а посебен акцент се става и на младите земјоделци. Во интервју за „Newsmax Balkans“, министерот ги претстави резултатите од реализираните повици, но и плановите за следниот период.
„Како Министерство работиме во делот на модернизација на земјоделството, веќе се објавени низа јавни повици кои што значат стимулација на македонските земјоделци. Покрај стандардните и редовните ИПАРД објави за набавка на механизација, преку националните програми објавивме серија јавни повици”, истакна министерот Цветан Трипуновски.
Еден од највпечатливите повици е т.н. мерка 50-50, со која Министерството кофинансира набавка на модерна земјоделска механизација.
„Првиот јавен повик од националните програми кој го објавивме е во делот за набавка на механизација, тоа е познатата мерка меѓу земјоделците како 50-50, каде што кофинансираме набавка на модерна механизација”, појасни министерот.
Дополнително, се реализирани и повици за приклучна механизација, како и за набавка на современи системи за заштита на земјоделските производи од климатските промени.
„Тука би сакал да го споменам и јавниот повик за инвестиции за набавка на опрема за производство на храна од животинско и неживотинско потекло, тоа е за малите семејни бизниси. Во овој јавен повик се и инвестициите за производство на вино и алкохолни пијалоци од помал обем. Значи преку овие јавни повици даваме финансиски средства за набавка на опрема и машини кои што ќе значат модернизација и подобрување на постојните капацитети”, посочи министерот Трипуновски.
Особено внимание Министерството посветува на младите земјоделци, како двигатели на иднината во аграрниот сектор. Koe веќе дава конкретни резултати.
Министерот Трипуновски информираше дека на јавниот повик за млади земјоделци пристигнале вкупно 254 апликации, од кои се одобрени 117. Тој нагласи дека ова претставува само една од мерките што досега се реализирани, а во наредната година ќе бидат објавени и нови програми наменети за младите земјоделци.Во завршницата, министерот испрати јасна порака за иднината на земјоделството:
„Клучот на иднината во земјоделското производство во Македонија, регионот и во светот е внесување на свежа енергија, односно млади луѓе кои што ќе започнат да се занимаваат со земјоделство”, заклучи тој.
