ТРИ ЛИЦА ЗАВРШИЈА ВО ПРИТВОР ЗА ЛАЖНИТЕ ПОТВРДИ ЗА БУГАРСКО ПОТЕКЛО: Македонското друштво „Илинден“ бара истрагата да се прошири
Притвор добија трите лица кои албанската полиција ги уапси деновиве поради издавање на лажни потврди за бугарско потекло во Острени, Голо Брдо. Судот на администраторот на единицата, Љуан Мјештри(62) и на Арлин Лимани(33), раководител на секторот за социјални работи и двајцата од Острени, им одреди мерка затворски притвор. За разлика од нив, Фитим Бала (61), од селото Требиште, секретар на Советот на општина Булќиза, доби мерка „куќен притвор“.
Новинари ја открија аферата. За услугата, лицата наплаќале по 950 евра. Од Македонското друштво „Илинден“ од Тирана велат дека праксата трае со години и се надеваат дека тука нема да запре истргата, туку ќе се шири. Потсетуваат дека пописот нема да покаже точни податоци за националната припадност на населението во Албанија, односно за македонското малцинство врз кое се вршеше притисок да се изјасни како бугарско.
„Со интензивирањето на издавањето лажни потврди, кои ги добиваат албански граѓани од сите етнички заедници, но и другите проблеми кои го следеа пописот, повеќе од сигурни сме дека резултатите нема да ја дадат објективна слика за етничката припадност на популацијата во земјата“, велат од друштвото.
